دنیا کو جنگی تجربوں کے بجائے امن کے تجربے کرنے چاہئیں

 

اگر پاکستان کی مخلصانہ کوششوں کے نتیجے میں ایک بار جنگ بندی ممکن ہو چکی ہے تو اس کے دوبارہ آغاز کے امکانات یقیناً کم ہو جاتے ہیں، تاہم انہیں مکمل طور پر رد نہیں کیا جا سکتا۔ اگر جنگ دوبارہ بھڑکتی ہے تو یہ محض ایک خطے کی ناکامی نہیں بلکہ پوری دنیا کی اجتماعی ناکامی تصور ہوگی، جو ایک وسیع تر عالمی تصادم کی راہ ہموار کر سکتی ہے۔

عالمی معیشت پہلے ہی غیر یقینی صورتحال سے دوچار ہے۔ اگر اس پر مزید دباؤ پڑا تو یہ کمزور معیشتوں کو شدید بحران کی طرف دھکیل دے گا، جس کے نتیجے میں مزید ممالک اس کشیدگی میں شامل ہو سکتے ہیں۔ یوں عالمی سطح پر دھڑے بندی اور بلاکس کی سیاست مزید واضح ہو جائے گی۔

مزید برآں، غلط فہمیوں میں اضافے کا خطرہ بھی بڑھ رہا ہے۔ ماضی میں بھی یہ خدشات سامنے آئے کہ بعض حملوں کا مقصد خلیجی ریاستوں کے درمیان بداعتمادی پیدا کرنا تھا۔ ایسے حساس حالات میں پاکستان نے مثبت کردار ادا کرتے ہوئے کشیدگی کم کرنے کی کوشش کی، جو قابلِ تحسین ہے۔

آج کی دنیا میں انٹیلی جنس نیٹ ورکس اور معلومات کی تیز تر ترسیل نے جہاں سہولت پیدا کی ہے، وہیں غلط معلومات (Misinformation) اور گمراہ کن معلومات (Disinformation) کے ذریعے تعلقات کو مسخ کرنے کا خطرہ بھی بڑھ گیا ہے۔ غلط تجزیے اور مبالغہ آرائی ممالک کے درمیان بداعتمادی کو مزید گہرا کر سکتے ہیں۔

سوشل میڈیا اور جدید ٹیکنالوجی نے میڈیا وار کو ایک نئی جہت دی ہے، جہاں بیانیہ سازی (Narrative Building) اور میڈیا ڈپلومیسی کے ذریعے مخالفین کو کمزور کرنے کی کوشش کی جاتی ہے۔ اگر کسی ملک کو معلومات تک رسائی سے محروم کر دیا جائے یا اس کے خلاف منظم پروپیگنڈا کیا جائے تو وہ غلط فیصلے لینے پر مجبور ہو سکتا ہے۔

ایٹمی ہتھیاروں کے اس دور میں ایسی کوئی بھی غلطی تباہ کن ثابت ہو سکتی ہے، جس کے اثرات پوری انسانیت کو ناقابلِ تلافی 

اگر جنگ بندی کے اس عرصے کو مثبت انداز میں استعمال کیا جائے تو یہ پائیدار امن کی بنیاد رکھ سکتا ہے اور دنیا کے لیے ایک ٹھنڈک اور سکون کا پیغام بن کر ابھر سکتا ہے۔ تاہم، دوسری جانب اس تنازع کے مخالف فریق ممکنہ خطرات کو مدنظر رکھتے ہوئے اپنی عسکری تیاریوں کو بھی جاری رکھے ہوئے ہیں۔ اگر یہ جنگ دوبارہ شروع ہوئی تو یہ صرف ایک معمولی تصادم نہیں ہوگا بلکہ انتقامی سوچ کے تحت زیادہ شدت اور خطرناک انداز میں سامنے آ سکتا ہے، جس کے اثرات کہیں زیادہ تباہ کن ہو سکتے ہیں۔نقصان پہنچا سکتے ہیں۔

اب بھی وقت ہے کہ عالمی برادری اپنے اثر و رسوخ کو جنگی دھڑوں کی حمایت کے بجائے پائیدار امن کے قیام کے لیے استعمال کرے۔ امن پسند پالیسیوں کی حوصلہ افزائی اور اشتعال انگیز رویوں کی حوصلہ شکنی ناگزیر ہے۔

پاکستان کی موجودہ کوششیں ایک مثبت مثال ہیں۔ عالمی طاقتوں کو چاہیے کہ وہ ان کوششوں کو تقویت دیں اور اقوام متحدہ کے پلیٹ فارم سے اسلحہ کی فراہمی پر پابندی جیسے اقدامات پر غور کریں، تاکہ جنگی رجحانات کی حوصلہ شکنی کی جا سکے۔

یہ ذمہ داری صرف ریاستوں تک محدود نہیں بلکہ ہر فرد، ادارے اور میڈیا پلیٹ فارم پر بھی عائد ہوتی ہے کہ وہ امن کے بیانیے کو فروغ دیں۔ اجتماعی کوششوں سے ایک ایسا ماحول تشکیل دیا جا سکتا ہے جہاں امن ایک غالب سوچ بن جائے۔

انسانیت کو یہ باور کروانا ہوگا کہ ترقی، خوشحالی اور استحکام جنگ میں نہیں بلکہ امن، تجارت، اور باہمی تعاون میں پوشیدہ ہیں۔ وہی مقاصد جو آج طاقت کے ذریعے حاصل کرنے کی کوشش کی جا رہی ہے، محبت، اعتماد اور تعاون سے زیادہ پائیدار انداز میں حاصل کیے جا سکتے ہیں۔

یہی سوچ ایک نئے "سافٹ پاور انقلاب" کی بنیاد بن سکتی ہے، جو ایک متوازن اور پرامن عالمی نظام (New World Order) کی راہ ہموار کرے گی۔